制服誘惑之不復再的皇家香港警察
1967年嘅暴動，香港警察嘅表現備受英女皇同埋香港市民讚賞，從此之後，事頭婆就喺香港警察加上皇家兩個字以示表揚。之後幾十年，港英政府亦都有從1967年嘅動盪之中學習，為咗撫平民怨推行咗一系列嘅整治貪污濫權嘅行動。其中一位值得一提嘅政治推手係香港民主元老杜葉錫恩，佢除咗大力推行ICAC嘅成立，仲催生咗警察投訴委員會，最後呢個委員會成為咗獨立單位監管警察嘅違規問題。跟住一系列嘅政府宣傳都標榜香港警隊為服務性質嘅公僕，為民請命儆惡懲奸嘅形象曾經深入民心，香港亦都曾經係罪案率極低嘅城市，香港警隊甚至被譽為Asia’s Finest。
但係一開始警隊嘅形成，其實完全係為咗保護統治者而設，華人警察只可以做前線人員，管理層永遠都係英國人或者歐洲人。呢一種情況有學者認為係殖民者剝奪華人自治權嘅手段，亦都有另一種講法，話當時中英兩國正在處於戰爭當中，當時華人被外國征服帶嚟嘅民族主義同埋反外情緒，令到佢哋不屑為英國人服務，更加唔想比其他中國人視為漢奸，所以就算英國當時想招募本地華人基本上都係徒勞。所以喺唔多選擇嘅情況之下，當時嘅殖民地政府就被迫招募一啲逃船者、海灘流浪者、或者退役水手士兵作為最初嘅警察，所以啲人成日話「好仔唔當差」或者差人係「有牌爛仔」，其實都係有歷史依據可以追溯。呢位學者仲話喺1997年之前，華人警官嘅隊伍亦都充斥着三合會成員。所以喺殖民時期，當時嘅腐敗被普遍接受，「強迫認罪係常態，毆打犯罪分子係生活方式」（參閱以下資料來源）
香港警隊，由始至終都係中央集權，係香港唯一嘅執法隊伍，喺法律上佢哋被賦予執行19項職責嘅權力，由控制公共道路交通、維持公共場所秩序、到場所嘅許可證發放，都係佢哋嘅權力同職責所在。呢啲無上權力基本上係令佢哋可以無孔不入地干涉香港人嘅生活（又可以選擇性執法）。佢哋可以隨時覺得你「有可疑」就上前截查你。而喺大多數嘅案例之中，被拘捕者上到庭，法官通常只係接受警察對事實嘅簡要陳述同對情況為最終意見，鮮有要求額外提供客觀事實。根據《交通條例第374章》香港警察更加可以喺冇懷疑嘅情況之下根據《第43A條》同埋《第60條》截停車輛要求駕駛員出示駕駛執照。
佢哋嘅無限權力，係咪完全冇辦法管制呢？
喺香港基本上有五種方式抗衡警察嘅不當行為：
- 警察投訴處 CAPO，但係係因為由佢哋自己人管理，所以公信性被質疑。其次就係監警會（IPCC）入邊嘅委員由香港特別行政長官直接委任，只可以透過警隊提供嘅調查報告作出監察，並無任何嘅調查權力。
- 曾經有立法會嘅監督，立法會議員會提議制定一啲草案去監控警隊濫權。例如：1993年立法局議員陶君行以及人權組織指控警察投訴委員會（PCC）不起作用。他們指出「持續高企」的投訴率和「無法接受的低」實質證實率，作為警察不當行為猖獗和問責制度未能正常運作的證據。
- 非正式嘅政治控制即係利益團體嘅研究報告，新聞界嘅調查報道。
- 官方或國際公約，例如香港人權法案條例，國際警察條例，刑事起訴同埋私人民事訴訟。
- 佢哋自己嘅專業操守同埋同行壓力。
隨着香港社會嘅法治崩壞，好多以上嘅監控方式不再有效。
歷史上，香港警察一直行使廣泛而不受限制嘅權力，除咗英國政府法律上賦予嘅特權之外，呢一個現象有學者覺得同中國文化嘅傳統權威主義有密切關係。佢話「中國人喜歡強而有力嘅政府而唔係公開異議，更鍾意有結構嘅自由而唔係自發嘅秩序，更加喜歡可預見嘅連續性，而唔係不確定嘅變化。喺文化上，帝制中國冇個人權利嘅概念，亦都冇實行法治，作為一個傳統中國社會，香港係按儒家倫理規範嚟治理。呢個現象不可避免地導致咗警察濫用權力嘅問題」（參閱以下資料來源）
時移世易，政權嘅轉移並冇令到民主民生得到改善，反而步步進逼嘅政策，令到警民關係不斷緊張，令到2019年香港人爭取民主嘅運動遇上不公平嘅警察待遇。當呢個世界越嚟越黑暗，貓館長希望我哋唔好俾世界改變，繼續保持香港人應有嘅善良同堅持，除咗唔好忘記之外，更可以從傷痛之中學習，喺應該爭取嘅時候爭取，多啲支持身邊仍然為善良發聲嘅人，無論透過任何途徑，無論有幾攰，都唔好低估我哋聚沙成塔嘅力量，仍然喺我哋嘅崗位發光發亮打破黑暗。
答返之前嘅問題
1）點解以前嘅警察制服係軍綠色？
因為香港警隊喺1844年建立係一支為殖民統治者服務嘅半軍事化部隊，而軍綠色就代表呢一種半軍事化嘅形象。
2）其他國家嘅警察制度係點樣㗎？
美國警隊以去中心化嘅形式運作，有聯邦警察，州政府同市政府，同埋唔同function嘅部門，各自有佢哋獨立運作嘅警察隊伍，根據各州各市嘅法例執法。美國警察執法嘅時候一定要以武力對等為基礎，如果喺武力唔對等嘅情況下，警察強行執法，佢除咗會被停職之外，仲要受法庭審判，要附上法律責任。仲有喺美國警察係唔可以隨便截查市民，一定要有客觀事實同埋可見嘅極端行為，佢先可以截查你。
日本嘅警察系統以高效率、低犯罪率同埋強大嘅社區關係以聞名。國家警察廳NPA係警察系統入邊嘅最高級別，其次就係喺47個縣入邊各自擁有獨立嘅警察部隊稱之為縣警，通常喺NPA嘅監督下半自治地運作。最後就係派出所同埋駐在所，處理小型犯罪及提供社區幫助。日本警察非常重視犯罪預防，警察經常巡邏參加社區活動提供安全同犯罪預防嘅教育。