夕陽下的報紙檔

從夕陽行業透視新聞自由邊界

紙媒衰落同近年聞風色變嘅國安法令香港報紙檔一蹶不振就大家都知，然而新聞自由嘅重要同脆弱你又了解幾多？

1903年太平天國後人兼澳藉華人謝纘泰創立第一份英文報紙《南華早報》，然後第二年就喺中環花園道開設首個報紙檔，目的就係為咗擴大讀者群令資訊流通支援反清革命。

之後幾十年新聞自由就喺中英角力嘅狹縫下綻放，特別係大戰過後1949年共產黨執政，香港因為殖民政府統治形成咗當時亞洲地區嘅一片新聞自由綠洲。好多逃離中共政治嘅難民及其後裔喺八九十年代開辦報紙，令呢段時間成為報紙檔嘅黃金時代。統計資料話當時有2500個報紙檔，中文日報18份，英文日報兩份，最繁忙嘅報紙檔呢每日可以賣過千份報紙。

1995年，黎智英創辦蘋果日報，一開始以割喉式嘅方法減價到兩蚊一份，又以全彩色印刷創新嘅版面編排衝擊當時嘅香港報業，令到好多報紙結業，又因為佢嘅報道手法同狗仔隊文化令到好多香港人對呢份報紙愛恨交纏。因為一方面佢彰顯到新聞自由，另一方面又被視為煽情同踩界。

咁到底乜嘢係新聞自由有啲咩講得，咩唔講得呢？根據聯合國喺1948年嘅世界人權宣言入邊就有提到新聞自由就係講緊人民有權利喺唔受政府審查嘅情況下報道新聞或傳意見，有揭示真相，監控政府以免佢權力過大嘅作用。簡單啲來講喺自由世界，批評政府係可以嘅，但係捏造事實毁謗同造假新聞就唔可以。

雖然新聞自由係為咗保障人民嘅知情權而產生，但因為近年社交媒體同假新聞嘅興起，令事實同意見嘅界線變得模糊，令人對媒體失去信心，對新聞自由嘅存在意義產生懷疑，令佢受到衝擊，喺Freedom House 2017年嘅報告上面就話竟然只有13%嘅全球人口擁有新聞自由，而係Reporters Without Borders嘅另一份2019嘅報告入邊就話只有9%添。呢啲數字顯示左新聞自由嘅脆弱同珍貴⋯⋯你哋又覺得喺海外嘅我哋又可以點樣維護新聞自由呢？希望大家可以以身作則，分享多啲以事實為基礎嘅新聞頻道，例如BBC中文、Hong Kong Free Press同獨立媒體，遇到有疑問嘅新聞要不斷求證，培養批判性思考，抗衡虛假信息傳播。

▶ 觀看影片