最可愛嘅人民公敵
經歷60年代尾嘅社會動盪，港英政府開始正視香港人嘅民生，喺各政府部門加強以民為本嘅施政，並以香港政府新聞處作為溝通橋樑，製作一系列嘅宣傳活動，拉近同市民嘅距離。
1967年12月許敬雅由英國空降到香港，接任政府新聞處（Information Service Department）Art Director 一職，制作咗一系列嘅政府宣傳活動。而當中嘅大反派人民公敵「垃圾蟲」就最深入民心。呢隻令人又愛又恨嘅綠色怪獸，透過彩色電視嘅興起由街頭上嘅海報進入每一個家庭嘅客廳，從而令佢風頭一時無兩。亦都因為咁樣港英政府呢個清潔香港宣傳活動非常成功，培養咗香港人嘅公德心，以保持地方清潔去愛護自己嘅城市。
除咗加強同市民嘅溝通之外，港英政府亦都增加市民投訴政府嘅途徑及喺制定政策嘅時候加強考慮民意，最後令市民對政府嘅擁護度大幅提升。
70年代嘅港英政府選擇用親民嘅措施以微笑治港，佢哋明白社會撕裂唔係靠短期嘅夜賓週活動或者派幾個錢（消費券）嘅表面功夫就可以修補，而係靠真誠嘅體恤同埋聆聽，作出實際可以改善民生嘅德政。今日嘅香港人當然唔會再幻想今日嘅香港政府會以呢段歷史為鑒，改變態度修補撕裂，但係作為香港人嘅我哋，希望無論身處何方都要記住呢一段美好，將呢一份香港人嘅精神同價值保存同埋傳揚。