溫暖過無數香港板間房的爐 —— 有時亦點着了火。
要講 60 年代最具代表性嘅香港製造，就一定要講吓呢個經典火水爐。香港自「盤古初開」就已經有住屋問題，啲樓起到密密麻麻，當中好多基層只能夠租住唐樓嘅小間房，好多時候洗手間同廚房都要同其他人一齊用，而呢一個火水爐嘅出現就大大咁縮細咗原本燒柴煮食嘅廚房空間。
火水即係煤油嘅意思，個爐原本嘅設計係專為戶外同埋軍事使用嘅，之後就被香港本土嘅廠家改造，將佢整大啲啲嚟比室內用。爐身用薄鐵皮製造，非常慳位輕巧又平，一推出市場基本上就已經瘋魔萬千師奶，成為家家戶戶嘅重要家當。但係亦都因為佢嘅輕巧令到佢好容易被打翻釀成意外，好多嚴重嘅火災例如石硤尾大火都係因為呢一種類似嘅煤油燈燒着棉被而釀成一發不可收拾嘅火災。
隨住石油氣同煤氣普及，火水爐已經慢慢被淘汰，結束佢曾經飽暖萬家嘅歲月。