留住經典 細味人情
海安係香港第二老嘅冰室，1952年開業，差少少就到70年嘅鉑禧紀念，因為好少接受媒體訪問，多少都帶點神秘色彩。冰室位於上環海和碼頭，開業嘅時候正值人潮興盛嘅碼頭時代，根據好客嘅老闆同老茶客得知，以前嘅海安主要以服務船員工人為主，取名海安，有祝願客人海上安全，風調雨順之意。
海安最早期係源起自捷榮咖啡，係人稱咖啡大王的黃橋所創辨，經過幾次轉手之後，最後一代嘅老闆就係早期合夥人之一蝦叔個女歐陽女士。雖然近代嘅海安同捷榮已經無直接關係，但兩者嘅淵源甚深，金茶王創辨人黃家和以前以少爺仔身份經常喺海安打躉，而翠華老闆李生都曾經喺海安做過外賣員，所以海安喺香港冰室或茶餐廳發展史上有一個特別位置。
從門外罕有簷蓬門面，大鐵閘，手寫招牌字，到店內嘅攪盤電話，鐵風扇，同喺你眼前嘅紅色實木卡位都係歐陽女士盡心保留原貌嘅成果，希望客人感受到海安嘅舊，要知道懷舊背後係一大堆嘅日常問題同煩惱，將舊野修好係比重新裝修付出更多，更消耗更多時間心力。
除了歴史故事，裝修擺設，歐陽女士嘅默默堅持同細緻都體現喺食物上。雖然這裡沒有五星級大廚，但他們對食物要求和品質追求都很高的，所以這裡的食物是要細心去品味的。喺你面前眼看嘅一杯普通奶茶，但係老闆就會不計成本效益精益求精咁加入清香嘅杏仁味令佢更順滑。
而呢份西多士，老闆娘就好有心咁推出迷你版本，無為咗成本效益而放棄客人需求，因為老闆娘覺得如果太大份客人食得過飽就食唔到應有嘅美味。
而老闆娘最儍勁嘅其中一個諗法就係，佢唔太希望店大排長龍令店內嘅人唔可以好好享受呢個空間，冰室係一個希望讓人放慢嘅地方，所以喺海安，你可坐相對地耐，食完野店員係唔會立刻將碗盤收走。
海安係到咗2021年10月30號最後一天先對外公佈他們要結業的消息，事前沒有半點風聲傳出，他們無喺最後嘅日子想賺更多嘅錢，專心像平常做好每一天，最後那兩星期的水準沒有因為快結業而有任何的變化，甚至在最後那一天老闆娘還是依舊躲在廚房繼續切叉燒。
或者海安喺呢一刻已經劃上句號，一間老店傳承沒有延續下去的原因實在太多，但他們留下來那份深耕細作和重視人的精神，希望你會透過今次體驗感受到一啲啲，記住呢份香港人精神，去到天涯海角都要將佢延續落去。