電影審查制度變遷
喺呢個紅線處處、高度敏感嘅年代，好容易會有種窒息嘅感覺，但係其實政權對電影藝術嘅政治審查，從來都唔係新鮮事，只係程度不同同埋民眾嘅知情度及反應不同。今個AR展覽就同大家探討吓，英國殖民政府下嘅秘密審查制度對香港電影文化嘅影響，再對比下當時香港人嘅反應同而家有咩唔同？
20世紀初到1937年呢段時間，雖然港英殖民政府有暗地裏實施審查制度，以維持佢哋嘅管治，但係其實程度非常之寬鬆，主要都係針對殖民者與被殖民者嘅關係，以及種族通婚關係為禁忌。其他題材都好少直接干預。
50年代香港影業開始蓬勃，國共內戰兩派嘅拉扯令到港英政府嘅審查制度收緊，1953年港督更加列出電影檢查規例隸屬於公共娛樂場所規例172章。電影工作喺呢一個時間正式交由檢查員小組同埋審查委員會負責，所有打算喺香港放映嘅影片無論係本土定係海外製作，都會交由委員會審理。審查員必須對以下有關嘅電影內容提高警覺：
- 加深政治敵對，並可能引發強烈政治情緒嘅事件
- 容易觸發種族或民族仇恨嘅嘢，例如：排外宣傳口號、不同政治體制之間令人產生誤解嘅比較、不必要地展示軍隊，藉此美化軍隊精神並令人覺得某國軍隊比他國優勝
- 煽動社會一部份人用武力推翻現政府
- 跟友好國家關係產生不良影響，例如：嘲弄或揶揄和英國政府關係良好嘅元首
英國政府對電影嘅審查方針，主要係避免香港人被煽動及極力營造社會安定環境以維持經濟發展為主。佢哋嘅制度並冇以保護青少年及保障香港電影文化自由為重點，亦都冇意思拓展本土文化。面對當時審查，有電影人選擇服從，以商業角度為創作基本，製作大量老少咸宜無傷大雅嘅小品，以賺取最多錢為其電影事業嘅終極目標。亦都有電影人無懼紅線，不斷發揮創意尋找創作空間，明諷暗喻咁透過電影抗衡審查機制。更加有鍥而不捨嘅電影人不斷被禁，但係又不斷繼續申請上訴，期望佢哋嘅作品有見光嘅一日。以下就係一啲特別嘅例子：
《碼頭風雲 On the Waterfront》
1954年嘅好萊塢經典電影，講述紐約碼頭工會腐敗嘅故事，引起港英政府不安，恐防當時嘅香港人睇咗會引發工潮甚至暴動，因而被禁三年，於1957年才獲解禁。
《再見中國》
1974年香港導演以中國文化大革命為背景設定嘅電影。講述四名圖往香港嘅廣州學生嘅故事，佢哋逃離中國之後發現香港嘅生活並不像佢哋預期般美好，片中描繪文化大革命期間中國社會嘅淒涼現象同時對殖民地香港呢個物質主義嘅城市作出批判，反映當時平民嘅無可奈何同埋喺政治鬥爭中嘅矛盾。此片被禁超過十年，於1987年解禁。
而近年，有不少電影均因為官方審查制度而不能公映，業界自我審查也發揮到淋漓盡致，例如某紅媒報章點名批評某部電影或某導演，其他同業在壓力下放棄同呢啲被點名嘅導演演員合作。以呢種低成本嘅方法散播白色恐怖，在製作層面形成審查同互相猜度，政權就不需要向輿論及國際社會負責都可以達到管治效果。
回顧歷史，香港人既冇被英國人款待，亦都冇被中國人寵愛，作為本土文化不被珍視嘅族群，可以如何自處自立？貓館長認為要靠嘅就係自強自愛，吸收新知識之餘不忘重新認識學習我哋過往嘅文化，珍惜我哋嘅共同回憶，並將佢發揚光大，以自身嘅力量將佢傳頌落去。
唔好睇小民間自發機構嘅能量，佢哋足以抗衡政府，捍衛我哋嘅文化藝術自由。以下就係其他國家嘅自發團體，自訂一套電影審查法則，得到業界響應，一方面可以保護青少年不受負面訊息影響，亦都不被政府介入干預藝術文化自由，以達致一個良好健康嘅平衡。（當然每個國家嘅制度同政治氛圍都唔同，唔係想要直接比較，而係有一個概念知道自由國家嘅電影分級制度係點樣誕生）
美國電影協會 MPAA
電影喺美國出現後無幾耐，各州同城市政府就開始立法對電影內容進行審查。至1915年，美國最高法院宣佈電影放映純粹係一種商業活動，並唔屬於國家出版業或公共輿論媒體嘅一部份，因此唔享有憲法下嘅言論自由保障。美國政府名正言順介入電影制作嘅政治審查。直至到1922年，一位睇唔過眼嘅天主教神父William Hays公開聲稱電影正敗壞美國嘅道德價值觀，並自發起草左一部電影審查法典。為咗抵制政府對電影製作嘅干預，電影業嘅行內人亦都非常支持呢部「法典」嘅實行，仲成立左美國電影協會（Motion Picture Association of America, MPAA）呢個非牟利組織去處理呢啲電影分類評級工作。
經過時代嘅變遷，按照現行美國法律，冇任何人或者機構會強迫製片人將電影送至美國電影協會進行評級評定，但係絕大多數嘅製片人同埋發行人都係會提交佢哋嘅電影進行評級，因為當電影評級之後等如就係對於電影嘅一種認證。亦即係話美國嘅電影分級制度唔係強制性，而係自願嘅。
日本映畫倫理管理委員會（映倫）
二戰後，日本電影迎來自由黃金期並迅速復甦。但自60年代起，受電視和外國影片衝擊，本土電影業受挫。70年代起，憑藉恐怖、情色、動畫題材復興，但伴隨社會問題增加，政府加強對未成年保護和媒體內容審查。
1949年成立映畫倫理規程管理委員會（舊映倫），隸屬於日本影像製作者聯盟，類似美國電影協會自律審查。1956年基於舊映倫成立新映倫，1957年獨立並開始吸納電影界外人士參與審查，包括故事片、紀錄片等，強調客觀公正審查。
2009年改為任意團體，更名為映畫倫理委員會；2017年再更名為映畫倫理機構。日本審查由民間人士和學者組成，與美國不同，所有影片必須通過映倫審查才能上映，未審查影片不得放映。