末代欖王招徒弟
十三歲就開始喺深水埗賣飛機欖嘅郭鑑基（基伯），一生遊遍窮街小巷，為當年嘅徙置區又唱又跳，表演飛欖絕技。當年一仙有三粒欖，聽落好似好少錢，但係原來對當時嘅基層小朋友嚟講已經係一份奢侈，住柴灣徙置區嘅常客冼先生話：「飛機欖係身份嘅象徵，有飛機欖就覺得自己好巴閉，簡直天下無敵，如果有人請你食嘅話，就代表佢對你好好，你係好緊要嘅朋友」
然而，喺散播笑聲嘅背後，基伯有時都會遇到一啲唔好嘅客人稱呼佢為「傻仔基」，故意掉一揸散銀落地下，令佢接唔到，有時又會俾食環署職員控告佢阻街（貓館長心諗：一條友一個箱點阻街呀，官字兩個口係常識，細路仔唔好問咁多嘢）
但係種種嘅現實困難，都似乎冇打擊到樂觀豁達嘅基伯，佢仲一賣就賣咗60年，當有人問佢：「你有四個仔女，但係冇人肯接手你嘅生意，後繼無人，你會唔會唔開心？」佢就話：「你估人人都可以賣飛機欖㗎咩，（收唔到徒弟）唔覺得可惜，由佢消失，由佢絕種。」